An Attitude which ruins a Community.....ജീവനും കൊണ്ടോടുന്പോഴും തെറിപറയുന്നവർ......

ജീവനും കൊണ്ടോടുന്പോഴും തെറിപറയുന്നവർ......
കലാപം തുടരുന്ന യെമനിലും,പ്രകൃതി ദുരന്തം തകർത്തെറിഞ്ഞ നേപ്പാളിലും ഇന്ത്യയെപ്പോലെ ഒരു രാജ്യം ഇത്രകണ്ട് വിയർപ്പൊഴിക്കിയിട്ടില്ല.സ്വന്തം രാജ്യക്കാരെപ്പോലെ തന്നെ മറ്റുള്ളവരെയും രക്ഷിക്കാൻ ഇന്ത്യ കാണിച്ച ഉൽസാഹം ലോകം വാഴ് ത്തുകയാണ്.
യെമനിലെ കലാപക്കാഴ്ചകളും, രക്ഷാപ്രവർത്തനവും നേരിട്ട് കണ്ട വ്യക്തി എന്ന നിലയിൽ ഇന്ത്യയുടെ, പ്രത്യേകിച്ച് വിദേശകാര്യമന്ത്രാലത്തിന്റ ഓരോ പ്രവർത്തനങ്ങളെയും അഭിനന്ദിക്കുക മാത്രമെ എന്നെപ്പോലെ ഒരാൾക്ക് കഴിയുകയുള്ളു.സനയിൽ നിന്ന് വിമാനം കിട്ടാൻ കഴിയാതെ വിഷമിച്ച അമേരിക്കക്കാരെയും,ലണ്ടൻകാരെയും,ഓസ്ട്രേലിയക്കാരെയും എയർ ഇന്ത്യയുടെ മുൻ സീറ്റിൽ ഇടം കൊടുത്ത് ഇന്ത്യയെന്ന മഹാരാജ്യം സുരക്ഷിത സ്ഥലങ്ങളിലെത്തിച്ചു.കുടിക്കാൻ വെള്ളവും കഴിക്കാൻ ഭക്ഷണവും നൽകി.
യെമനിൽ നിന്നും രക്ഷപെട്ട് ജിബൂത്തിയെന്ന ആഫ്രിക്കൻ രാജ്യത്തെത്തിച്ച മലയാളികൾ കൊച്ചിയിലേക്ക്  അടിയന്തര വിമാനം പറത്തണമെന്നാവശ്യപ്പെട്ട് ഒച്ചയുണ്ടാക്കി,
കേന്ദ്രമന്ത്രിയോടും,അംബാസഡറോടും തട്ടിക്കയറുന്നത് ഞാൻ നേരിട്ട് കണ്ടിരുന്നു.ഒരു ദിവസം ജിബൂത്തിയിലെ കപ്പലിൽ വിശ്രമിക്കാൻ പറഞ്ഞപ്പോൾ പറ്റില്ലെന്ന് പറഞ്ഞ് വാചകകസർത്ത് നടത്താൻ മലയാളികളായിരുന്നു മുന്പന്തിയിൽ.
അവിടെ ഒരു വടക്കേ ഇന്ത്യാക്കാരനും മുറുമുറുക്കുന്നത് ഞാൻ കണ്ടില്ല.
ജിബൂത്തിയിലുണ്ടായിരുന്ന വിമാനങ്ങൾക്ക് വീണ്ടും സനയിലേക്ക് പറക്കണം കാരണം അവിടെ അപ്പോഴും സുരക്ഷിത രാജ്യം സ്വപ്നം കണ്ട് കുട്ടികളടക്കമുള്ളവർ കാത്തിരിക്കുകയാണ്.
വിമാനങ്ങൾ അതിവേഗം കൊച്ചിയിലേക്ക് പറത്തിയാൽ ഇവരുടെ രക്ഷ അസാധ്യമാകും.
ഇതൊക്കെ അറിയാമായിരുന്ന മലയാളികൾ തന്നെയാണ് വീട്ടുപടിക്കൽ വേഗമെത്താൻ മുറവിളി കൂട്ടയത്.
യെമനിലെ സ്ഥിതിയിൽ നിന്നും വളരെ മോശമായിരുന്നു നേപ്പാളിലെ അവസ്ഥ മിനിട്ടുകൾ കൊണ്ട് ഭൂമി വിണ്ടുകീറി,കെട്ടിടങ്ങൾ നിലംപൊത്തി അങ്ങനെയുള്ള ഒരു സ്ഥലത്ത് നിന്നും എത്രയും പെട്ടെന്ന് ആളുകളെ രക്ഷിക്കുക എന്നത് മാത്രമാണ് ദൌത്യസംഘത്തിന്റെ പ്രഥമ ജോലി.
ഉല്ലസിക്കാൻ പോയ മലയാളികളെ വിമാനമാർഗം രക്ഷപെടുത്തി ദില്ലയിലെത്തിച്ചപ്പോൾ ചാനൽ മൈക്കുകൾക്ക് മുന്നിൽ രക്ഷാപ്രവർത്തനത്തെ വിലകുറച്ച് കാണിച്ച വിരുതൻമാരിൽ മുന്പന്തിയിൽ മലയാളികൾ തന്നെയായിരുന്നു.
എംബസിയുടെ ഇടപെടൽ മോശമായിരുന്നത്രേ...ഒരു മലയാളികയുടെ ആരോപണം എന്റെ ചാനലിൽ തന്നെയാണ് ഞാൻ കണ്ടത്.
എംബസി ഉദ്യോഗസ്ഥന്റെ മകൾ കെട്ടിടത്തിന്റ അടിയിൽ പെട്ട് മരിച്ചുവെന്ന വാർത്ത ദുബായിലിരുന്ന് ടിവിയിലാണ് ഞാൻ കണ്ടത്.ഈ മാനസികാവസ്ഥയിൽ എത്ര ഭംഗിയായാണ് അവർ അധ്വാനിച്ചത്?
പ്രകൃതി ദുരന്തത്തിനിടയിൽ ഇതിൽകൂടുതൽ രക്ഷ എങ്ങനെ ഒരുക്കാനാണ്?
അതൊന്നും മനസ്സിലാക്കാതെ സ്വാർത്ഥമായ അഭിപ്രായപ്രകടനങ്ങളിലൂടെ നാം നമ്മെ തന്നെയാണ് പരിഹാസ്യരാക്കുന്നത്.
യെമനിൽ ഇന്ത്യ നടത്തിയ രക്ഷാപ്രവർത്തനങ്ങളെ വാഷിംഗ്ടൺ പോസ്റ്റ് അടക്കമുള്ള പത്രങ്ങൾ വാനോളം പുകഴ്ത്തി.
ബിജെപി ഭരിക്കുന്ന ഇന്ത്യയായതുകൊണ്ടല്ല ഞാനിതൊക്കെ എഴുതുന്നത്.ഞാനൊരു ബിജെപി പ്രവർത്തകനോ അനുഭാവിയോ അല്ല.
പക്ഷേ നല്ലത് ചെയ്യുന്പോൾ കൊഞ്ഞനം കുത്തുന്ന ചില മലയാളികൾ നല്ലത് പറയാൻ കൂടി പഠിക്കണം.അത് ഇന്നത്തെ കാലത്തെ അനിവാര്യതയാണ്.