കലാപഭൂമിയിൽ നിന്നും പൊക്കിൾക്കൊടി ഉണങ്ങാതെ .......

ഐപ്പ് വള്ളികാടൻ

"സനാ വിമാനത്താവളത്തിൽ നിന്നും എയർ ഇന്ത്യയുടെ വിമാനത്തിനകത്തേക്ക് ഓടിക്കയറി സീറ്റുറപ്പിച്ച സ്ത്രീകളിൽ പലരുടെയും കണ്ണുകൾ ഈറനണിഞ്ഞിരുന്നു.രക്ഷനേടിയതിന്റെ സന്തോഷത്തേക്കാൾ എന്നന്നേക്കുമായി നഷ്ടമാകുന്ന യെമൻ എന്ന പോറ്റമ്മയെ വേർപിരിയുന്നതിന്റെ കണ്ണീർ മഴയാണ് അവരുടെയൊക്കെ കണ്ണുകളിൽ പെയ്തിറങ്ങിയത്".
.....
ദുബായിൽ നിന്നും മുൻവിധികളോ മുന്നൊരുക്കങ്ങളോ ഒന്നുമില്ലാതെയാണ് ടെർമിനൽ ഒന്നിൽ നിന്നും എത്യോപ്യൻ എയർലൈൻസിന്റെ വിമാനത്തിൽ ഇടംപിടിച്ചത്.പാസ്പോർട്ടും,ജിബൂട്ടിയിലും അവിടെനിന്ന് സനയിലേക്കും പോകാനുള്ള ചിലവ് കാശും മാത്രമായിരുന്നു പ്രധാന കരുതൽ.
അബുദാബിയിലെ ജിബൂട്ടി എംബസിയിൽ വീസക്ക് അപേക്ഷിച്ചെങ്കിലും അത് വൈകുമെന്നറിഞ്ഞു.രക്ഷാപ്രവർത്തനം അവസാനിക്കുന്നതിന് മുന്പ് കലാപഭൂമിയിലെത്താനുള്ള പരക്കം പാച്ചിലിൽ ചെറിയ സാഹസികനായി.
ഇന്ത്യക്കാർക്ക് ഓൺഅറൈവൽ വീസ കിട്ടുമെന്ന് ട്രാവൽ മേഖലയിലെ ചില സുഹൃത്തുക്കൾ തന്ന ഉറപ്പിന്റെ പിൻബലത്തിലാണ് രാത്രി വൈകിയെടുത്ത ടിക്കറ്റിൽ യാത്ര പുറപ്പെട്ടത്.വിമാനം ദുബായിൽ നിന്നും പറക്കാൻ വൈകിയതിനാൽ എത്യോപ്യയിലെ അഡിസ് അബയിൽ നിന്നും കിട്ടേണ്ട കണക്ഷൻ ഫ്ലൈറ്റ് എന്റെ സീറ്റ് ഒഴിച്ചിട്ട് പറന്നകന്നു.എയർലൈൻസ്് ജീവനക്കാരുടെ കാലും കയ്യും പിടിച്ച് അവിടെ നിന്ന് കെനിയക്കാരുടെ വിമാനത്തിൽ സീറ്റുറപ്പിച്ചു.
...
ജിബൂട്ടിയിൽ ഉച്ചസയമത്ത് വിമാനമിറങ്ങുന്പോൾ എയർ ഇന്ത്യാ വിമാനങ്ങളും,വ്യോമസേനയുടെ സി17 വിമാനവും രക്ഷാപ്രവർത്തനത്തിന് കാത്ത് കിടക്കുന്നത് കാണാമായിരുന്നു.വിമാനത്തിന്രെ ജനലിലൂടെയും പുറത്തിറങ്ങിയപ്പോഴും മൊബൈലിൽ ദൃശ്യങ്ങൾ എടുത്തുകൊണ്ടിരുന്നു.
ചെറിയ വിമാനത്താവളത്തിലെ എമിഗ്രേഷൻ മുഴുവൻ തിരക്കും ബഹളവുമായിരുന്നു.തിക്കിത്തിരക്കി പോകുന്നതിനിടയിൽ കേന്ദ്രമന്ത്രി വി.െക.സിംഗിനെയും,ജിബൂട്ടിയുടെ ചുമതലുള്ള എത്യോപ്യയിലെ ഇന്ത്യൻ അംബാസർ സഞ്ജയ് വർമയെയും കണ്ടുമുട്ടി.നേരത്തെ ദുബായിലെ കോൺസുൽ ജനറലായിരുന്നു സഞ്ജയ് ആ പരിചയം മുതൽക്കൂട്ടായി.അദ്ദേഹത്തിന്രെ ഫോൺനന്പരും തരപ്പെടുത്തി.
വീസക്ക് വേണ്ടിയുള്ള കാത്തിരിപ്പായിരുന്നു അടുത്തത്.മണിക്കൂർ രണ്ട് കഴിഞ്ഞെങ്കിലും വീസ കിട്ടിയില്ല.എമിഗ്രേഷൻ ഓഫീസർ ഒരു ചൂടനായിരുന്നു.അദ്ദേഹത്തിന്റെ അടുത്ത് കാര്യം ചോദിക്കാമെന്ന് വച്ച് ചെന്നു.
യു ജേർണലിസ്റ്റ്...വൈ യു ഹിയർ മുറി ഇംഗ്ലീഷിൽ പുഞ്ചിരിയുടെ കണിക പോലുമില്ലാത്ത  ചോദ്യങ്ങൾ.ചില്ലുമുറിയിൽ അടച്ചിട്ട് കാത്തിരിക്കാൻ പറഞ്ഞ് അയാളങ്ങ് പോയി.സമയം ഏറെ വിലപ്പെട്ടതായിരുന്നു.ഫോൺ കയ്യിലെടുത്ത് അംബാസഡറെ വിളിച്ച് കാര്യങ്ങൾ പറഞ്ഞു.അധികം വൈകാതെ കാര്യങ്ങൾ ശരിയാക്കാമെന്ന് പറഞ്ഞ് അദ്ദേഹം എന്നെ ആശ്വസിപ്പിച്ചു.ജിബൂട്ടിയിൽ ഇന്ത്യയുടെ എംബസിയോ,കോൺസുലേറ്റോ ഇല്ല,ഇവിടെ ജനിച്ച് വളർന്ന ബിസിനസുകാരനായ ഇന്ത്യാക്കാരനായ നളിൻ കോത്താരിയെ ഇന്ത്യൻ സർക്കാർ ഓണററി കോൺസുലായി(honorary consul) നിയമിച്ചിരിക്കുകയാണ്.
അരമണിക്കൂറിനുള്ളിൽ നളിൻ കോത്താരി എന്റെ മൊബൈലിലേക്ക് വിളിച്ചു.കാര്യങ്ങൾ ചോദിച്ചറിഞ്ഞു.പത്ത് മിനിട്ടിനുള്ളിൽ എന്റെ വാതിൽ തുറന്നു,ആർ യു ഐപ്പ് ഫ്രം ഇന്ത്യ?എന്ന് ചോദിച്ച് നളിൻ കോത്താരി മുന്നിൽ.പിന്നെ എല്ലാം വേഗത്തിലായി ബാഗുകൾ കിട്ടി,പാസ്പോർട്ടിൽ പച്ചനിറത്തിലെ പതിനഞ്ച് ദിവസത്തെ ടൂറിസ്റ്റ് വീസയടിച്ച് ഭദ്രമായി കയ്യിലേൽപ്പിച്ചു.നൂറ് അമേരിക്കൻ ഡോളറാണ് വീസക്ക് ചിലവായത്.
...
പിന്നെ ഹോട്ടലിലേക്ക്,ജിബൂട്ടിയിൽ അധികം ഹോട്ടലുകളില്ല.കെംപൻസ്കിയും,ഷറാട്ടണുമാണ് പ്രധാനം.അതിൽ ഷെറാട്ടണലിൽ ഞാൻ നേരത്തെ മുറി ബുക്ക് ചെയ്തിരുന്നു.ഗൾഫുകാർക്ക് പരിചയമില്ലാത്ത ആഫ്രിക്കൻ അറബി സംസാരിക്കുന്ന ഏതാണ്ട് ഇരുപത് വർഷത്തിലേറെ പഴക്കം വരുന്ന ബെൻസ് കന്പനിയുടെ ടാക്സിയിൽ ഹോട്ടലിലേക്ക്.
പോകുന്ന വഴിയിൽ പഴയ ഫ്രഞ്ച് കോളനിയുടെ ചരിത്രം രേഖപ്പെടുത്തുന്ന കെട്ടിടങ്ങളും,ഫ്രഞ്ചിലെഴുതിയ കടകളുടെ ബോർഡുകളും ഒക്കെ കണ്ടു.പത്ത് കിലോമീറ്റർ ദൂരമുണ്ട് ജിബൂട്ടി എയർപോർട്ടിൽ നിന്നും ഹോട്ടലിലേക്ക്.
റിസപ്ഷനിൽ ചെന്നപ്പോൾ റൂമില്ലായെന്ന് പറഞ്ഞു.നേരത്തെ ഓൺലൈനിലൂടെ മുറി ബുക്ക് ചെയ്തതാണെന്ന് പറഞ്ഞപ്പോൾ ഇരിക്കാൻ പറഞ്ഞു.
മാനേജർ വന്ന് പാസ്പോർട്ട് നോക്കി മുറി ഓക്കെയാണെന്ന് പറഞ്ഞു.
യെമനിലെ കലാപം തുടങ്ങിയ നാൾ മുതൽ ആളുകൾ ജിബൂട്ടിയിലേക്ക് അഭയാർത്ഥികളായി എത്തുകയാണ്.ഇവിടുത്തെ ഹോട്ടലുകളെല്ലാം യെമനികളെക്കൊണ്ടും അവിടെ നിന്നെത്തിയവരെകൊണ്ടും നിറഞ്ഞിരിക്കുകയാണെന്ന് ഹോട്ടൽ മാനേജർ പറഞ്ഞു.
തറനിരപ്പിലുള്ള മുറിയാണ് കിട്ടിയത്.ജനൽ ചില്ലുകൾ മറച്ചിരുന്ന കർട്ടൻ നീക്കിയപ്പോൾ സായിപ്പുമാരും മാദാമ്മമാരും ജോഗിംഗ് നടത്തുന്നത് കണ്ടു.ഏദൻ കടലിടുക്കിന്റെ അതിർത്തിയുള്ള ജിബൂട്ടിയിൽ അമേരിക്ക,ജർമ്മനി,ഫ്രാൻസ് എന്നിവരുടെ യുദ്ധവിമാനങ്ങളടെ ബേസുണ്ട്.പട്ടാള ക്യാന്പുകളും,ഇവരുടെ ഉന്നത ഉദ്യോഗസ്ഥരും മറ്റും ഇത്തരം ഹോട്ടലുകളിലാണ് താമസിക്കുന്നത്.
......
കഴിഞ്ഞ പത്ത് മണിക്കൂറിലേറെയായി വിമാനയാത്രയും,വിസയെടുക്കാനുള്ള കടന്പകളുമായി ക്ഷീണിച്ച് തുടങ്ങിയിരുന്നു.വിമാനത്താവളത്തിൽ നിന്നും പകർത്തിയ മൊബൈൽ ദൃശ്യങ്ങളും,കിട്ടിയ വിവരങ്ങളും ചേർത്ത് നാട്ടിലേക്ക് വാർത്ത അയക്കാനുള്ള സംവീധാനങ്ങളും തകൃതിയായി ഒരുക്കി.ഒരു മണിക്കൂറിനുള്ളിൽ വാർത്ത ശരിയാക്കി ഹോട്ടലിലെ വൈഫൈ സംവീധാനം ഉപയോഗിച്ച് അയച്ചു.
......
കുളിച്ചെന്ന് വരുത്തി രക്ഷാപ്രവർത്തനങ്ങൾ ഏകോപിപ്പിക്കുന്ന ഇന്ത്യയുടെ കൺട്രോൾ റൂമിലേക്ക്.ടാക്സിയിലാണ് യാത്ര.ഹോട്ടലിൻറെ മുന്നിൽ ടാക്സി നിർത്തി.കാരണം ലോക്കൽ ടാക്സികൾ കവാടം വരെയേ അനുവദിച്ചിട്ടുള്ളു.സ്വകാര്യ വാഹനങ്ങൾക്കും,പട്ടാള- സർക്കാർ വാഹനങ്ങൾക്കും മാത്രമാണ് ഹോട്ടലിനുള്ളിലേക്ക് പ്രവേശനം.പോലീസിനാണ് ഹോട്ടൽ സുരക്ഷയുടെ ചുമതല,പാസ്്പോർട്ടും,ബാഗും പോലീസ് പരിശോധിച്ചു, പിന്നെ ദേഹ പരിശോധനയും കഴിഞ്ഞ് ജിബൂട്ടിയിലെ കെംപൻസ്കിയിൽ പ്രവർത്തിക്കുന്ന കൺട്രോൾ റൂമിലേക്ക്.ജിബൂട്ടിയുടെ ചുമതലയുള്ള എത്യോപ്യൻ അംബാസഡർ സജ്ജയ് വർമയുടെ നേതൃത്വത്തിലുള്ള സംഘം അവിടെയുണ്ടായിരുന്നു.
സ്വന്തമായി ദൃശ്യങ്ങൾകൂടി പകർത്തേണ്ടതുകൊണ്ട് പണി തുടങ്ങി.സഞ്ജയ് വർമയുമായി രക്ഷാപ്രവർത്തനങ്ങളുടെ സ്ഥിതിഗതികളെപ്പറ്റി സംസാരിച്ചു.ചാനലിന് വേണ്ടി അഭിമുഖവും സംഘടിപ്പിച്ചു.രാത്രി പത്ത് മണിക്ക് ദിവസേന ഇവരുെട യോഗമുണ്ട്.കേന്ദ്രമന്ത്രി വി.െക.സിംഗും ഇതിൽ പങ്കെടുക്കും.അതാത് ദിവസത്തെ പ്രവർത്തനങ്ങളും,രക്ഷപെടുത്തിയവരുടെ എണ്ണവും വിവരങ്ങളും റിപ്പോർട്ടാക്കും.പിന്നെ അടുത്ത ദിവസത്തെ പ്രവർത്തനങ്ങളും ചർച്ച ചെയ്യും.രാവിലെ ജിബൂട്ടിയിൽ നിന്നും സനയിലേക്ക് പുറപ്പെടുന്ന രക്ഷാ വിമാനത്തിൽ സീറ്റുറപ്പിച്ചാണ് ഞാൻ ഹോട്ടൽ മുറിയിലേക്ക് മടങ്ങിയത്..
........
രാവിലെ അറ് മണിക്ക് വിമാനത്താവളത്തിലെത്തി.എയർ ഇന്ത്യയുടെ വിമാനത്തിൽ ഔദ്യോഗിക യാത്രയാണെങ്കിലും എയർപോർട്ട് ടാക്സ് കൊടുക്കണം 75 അമേരിക്കൻ ഡോളറാണ് ടാക്സായി ഇടാക്കുന്നത്.ബോർഡിംഗ് പാസും കിട്ടും.ഇതിൽ വിമാനത്തിന്റെ പേരോ വിവരങ്ങളോ ഒന്നുമുണ്ടാകില്ല.ഒരു കടലാസ് കഷ്ണം.
സനയിലെത്താൻ ഒരു മണിക്കൂർ സമയമാണ് വേണ്ടത്.ചില യെമനികളും,വിമാന ജോലിക്കാരും,കേന്ദ്രമന്ത്രിയും,അംബാസഡറും ഉദ്യോഗസ്ഥരുമാണ് വിമാനത്തിൽ.സാധാരണ വിമാനയാത്രയിലെന്നതുപോലെ എയർ ഹോസ്റ്റസുമാരുടെ ഹിന്ദിയിലും ഇംഗ്ലീഷിലുമുള്ള സുരക്ഷാ നിർദേശങ്ങൾക്കൊന്നും ഈ അടിയന്തര യാത്രക്കും മുടക്കമില്ല എന്നുള്ളത് എന്നെ അത്ഭുതപ്പെടുത്തി.
...........
ഒരു മണിക്കൂറിൽ സനയിലെ വിമാനത്താവളത്തിന്റെ ആകാശക്കാഴ്ച ദൃശ്യമായി.വിമാനത്താവളത്തിലിറങ്ങി അധികം സാഹസത്തിന് മുതിരരുതെന്ന് ഉദ്യോഗസ്ഥർ മുന്നറിയിപ്പും നൽകിയിരുന്നു.എനിക്കൊപ്പം വിമാനത്തിൽ ബിബിസിയുടെ സംഘവും ഉണ്ടായിരുന്നു.കെയ്റോയിലെ റിപ്പോർട്ടർ ഓർലയും,അമേരിക്കയിൽ നിന്ന് വന്ന മൂന്നംഗ ക്യാമറാ സംഘവുമായിരുന്നു ഇവർക്കൊപ്പമുണ്ടായിരുന്നത്.മാതൃഭൂമി ന്യൂസിന് വേണ്ടി റിപ്പോർട്ടിംഗും,ക്യമാറയും എല്ലാം ഞാൻ തന്നെയായിരുന്നു.
വിമാനം ഇറങ്ങിയ ഉടനെ യമനിയ എയർലൈൻസിന്റെ ബസ് വിമാനത്തിന്റെ അടുത്തെത്തി.കേന്ദ്രമന്ത്രിയടക്കമുള്ള സംഘം വിമാനത്താവളത്തിൽ കാത്തിരിക്കുന്നവരുടെ അടുക്കലേക്ക്.കിട്ടിയ സമയം കൊണ്ട് ദൃശ്യങ്ങളെടുത്ത് തുടങ്ങി.ഞാൻ വന്ന വിമാനത്തിന് തൊട്ടുപിറകെ രണ്ടാമത്തെ എയർ ഇന്ത്യ വിമാനവും ഈ സമയം സനയിലെത്തി.എവിടെ നിന്നെന്നറിയില്ല,ഒരു ഹൂതി പോരാളി തോക്ക് ചൂണ്ടി എന്റെ നേരെ ആക്രോശിച്ച് വന്നു.
ക്യമാറ പിടിച്ച് വാങ്ങി പരിശോധന തുടങ്ങി.അപ്പോൾ തോന്നിയ ഭയവും ആശങ്കയും വാക്കുകളിൽ വിശേഷിപ്പിക്കാനാകില്ല.ഭാഗ്യം അനുചിതമായ ദൃശ്യങ്ങളൊന്നും അയാളുടെ കണ്ണിൽപ്പെട്ടില്ല.
.......
ബസിലെത്തിയ സ്ത്രീകളും കുട്ടികളും വിമാനത്തുള്ളിലേക്ക് ഓടിക്കയറുകയായിരുന്നു.കൈക്കുഞ്ഞുങ്ങളും,പ്രായമായവരും ഒക്കെ ആ സംഘത്തിലുണ്ടായിരുന്നു.രക്ഷാപ്രവർത്തകർ ഇവരെ വിമാനത്തിനുള്ളിലേക്ക് ആനയിച്ചു.മൂന്ന് പേർക്കിരിക്കാവുന്ന സീറ്റുകളിൽ നാല് പേരെ വീതം ഇരുത്തിയാണ് വിമാനത്തിനുള്ളിൽ യാത്രക്കാരെ നിറച്ചത്.സ്ത്രീകളുടെ കണ്ണുകളൊക്കെ നിറഞ്ഞ് കവിഞ്ഞിരുന്നു.തൊട്ട് തലേ ദിവസം വിമാനത്തിനടുത്ത് വരെ വന്നിട്ട് തിരിച്ച് പോകേണ്ടി വന്ന വിഷമമൊക്കെ കണ്ണീർ മഴയായി പെയ്തിറിങ്ങുന്നത് ഞാൻ നേരിട്ട് കണ്ടു.അവരോട് സംസാരിച്ച് തുടങ്ങി.
സ്നേഹം മാത്രം തന്നിരുന്ന യമനികളുടെ ഇടയിലേക്ക്  തിരിച്ച് പോകണം,കലാപം അവസാനിക്കാൻ ഞാൻ പ്രാർത്ഥിക്കുകയാണ്,എല്ലാം വിട്ടെറിഞ്ഞ് പാസ്പോർട്ടിൽ എക്സിറ്റ് സ്റ്റാന്പടിച്ച് സനയില് നിന്നുള്ള എയർ ഇന്ത്യാ വിമാനത്തലിരുന്നാണ്  ചെറിയ തേങ്ങലോടെ നഴ്സായ മേരി എന്നോട് സംസാരിച്ചത്.
ഏതാണ്ട് ഇതുപോലെ തന്നെയാണ് യമനിലെ വിവിധ ഭാഗങ്ങളിൽ നിന്നുള്ള മലയാളികൾ അടക്കമുള്ള ഇന്ത്യാക്കാർ പറഞ്ഞത്.സ്നേഹവും ബഹുമാനവും നല്ല ശന്പളവും നൽകിയിരുന്ന നാട്ടിൽ നിന്നും ഒന്നുമില്ലായ്മയിലേക്കുള്ള യാത്ര തന്നെയാണ് ഇവരുടെ ഏറ്റവും വലിയ സങ്കടം.
സമാധാനവും സന്തോഷവും നിറഞ്ഞ യമൻ ഇപ്പോൾ വേദനകളും,വിലാപങ്ങളും കൊണ്ട് നിറഞ്ഞിരിക്കുന്നു.
സർക്കാരിനെതിരെ ഹൂതി വിമതരുടെ പോരാട്ടം അതിരൂക്ഷമായ യമനിൽ സൌദിയുടെ നേതൃത്വത്തിലുള്ള സഖ്യരാഷ്ട്രങ്ങളുടെ വ്യോമാക്രമണം കൂടിയായപ്പോൾ യെമൻ യുദ്ധഭൂമിയായി.പകൽ സമയം ശാന്തമാണെങ്കിലും രാത്രിയായാൽ ബോംബ്സ്ഫോടനങ്ങളുടെ കാതടപ്പിക്കുന്ന ശബ്ദവും തീഗോളങ്ങളുമാണ് ഉയരുന്നതെന്ന് രക്ഷപെട്ട മലയാളികൾ മാതൃഭൂമിയുടെ മൈക്കിന് മുന്നിൽ വിതുന്പലോടെ പറഞ്ഞു.
പോരാട്ടം തുടങ്ങിയതുമുതൽ ഇന്ത്യ രക്ഷാപ്രവർത്തനത്തിന് മുന്നിട്ടിറങ്ങി,ആകാശമാർഗം വഴി മാത്രം രക്ഷ സാധ്യമായ സനയിലേക്ക് അതിർത്തി പ്രദേശമായ ജിബൂട്ടിയിൽ നിന്നും എയർ ഇന്ത്യയുടെ വിമാനങ്ങൾ പറത്തി.കഴിഞ്ഞ മാസം പുതിയ ജോലി തേടിയെത്തിയവർ മുതൽ വിസിറ്റ് വീസയിൽ വന്ന്  വർഷങ്ങളോളം അനധികൃതമായ താമസിച്ച ഇന്ത്യാക്കാരെ വരെ സുരക്ഷിത താവളത്തിൽ ഇന്ത്യയുടെ ഓപ്പറേഷൻ റാഹത്തിലൂടെ എത്തിച്ചുകഴിഞ്ഞു.
ശന്പളകുടിശ്ശികക്ക് കാത്ത് നിൽക്കാതെ,ഉള്ളത് നുള്ളിപ്പെറുക്കിയാണ് ജീവന് വേണ്ടി സനയിൽ നിന്നുള്ള പലായനം.ദിവസങ്ങളോളം എംബസിയിൽ കയറി ഇറങ്ങിയും,വിമാനത്താവളങ്ങളിൽ ദിവസങ്ങളോളം കാത്ത് കിടന്നന്നുമാണ് പലരും എയർ ഇന്ത്യയുടെ വിമാനത്തിൽ സുരക്ഷിത താവളത്തിലെത്തിയത്.
സനയിലെ വിമാനത്താവളം ഹൂതി വിമതരുടെ കയ്യിലാണ്.ആകാശ വഴികൾ സൌദിയുടെ നിയന്ത്രണത്തിലും രണ്ട് കൂട്ടരെയും അനുനയിപ്പിച്ചാണ് രക്ഷാപ്രവർത്തനത്തിന് വിമാനം ഇറക്കാൻ ഇന്ത്യ അവസരമുണ്ടാക്കിയത്.പോരാട്ടം തുടങ്ങിയതിന് ശേഷം ഓരാഴ്ചയിലേറെ എയര് ഇന്ത്യാ വിമാനങ്ങൾ മാത്രമാണ് സനയിലേക്ക് പറന്നത്.ഇന്ത്യക്കാരല്ലാതെ അമേരിക്ക ഉൾപ്പെടെയുള്ള നാല്പതിലധിലധികം രാജ്യക്കാർക്കാണ് ഇന്ത്യൻ വിമാനങ്ങളും ,കപ്പലുകളും രക്ഷയായത്.
മൂവായിരത്തോളം പേരെ വിമാനമാർഗം മാർഗം രക്ഷപെടുത്തി.കുറെ അധികം പേരെ കപ്പൽ വഴിയും.പട്ടാള ജീവിതത്തിന്റെ അനുഭവസന്പത്തുമായി കേന്ദ്രവിദേശകാര്യ സഹമന്ത്രി ജനറൽ വി.കെ.സിംഗ് സനയിലും ജിബൂട്ടിയിലുമായി പ്രവർത്തനങ്ങൾ നേരിട്ട് ഏകോപിപ്പിച്ചു.എത്യോപ്യായിലെ ഇന്ത്യൻ അംബാസഡർ സഞ്ജയ് വർമ പ്രത്യേക നിയോഗത്തിൽ മന്ത്രിക്കൊപ്പം നിന്നു,ജീബൂട്ടിയിൽ ജനിച്ച വളർന്ന മുംബൈക്കാരനായ നളിൻ കോത്താരി ഓണററി കോൺസുൽ ജനറലിന്റെ ചുമതല ഭംഗിയായി നിർവഹിച്ചു.
ഇന്ത്യയിൽ നിന്നും യമന്റെ അയൽ രാജ്യങ്ങളിൽ നിന്നുമെത്തിയ കേന്ദ്ര സർക്കാർ ഉദ്യോഗസ്ഥർ ഊണും ഉറക്കവും വെടിഞ്ഞ് രക്ഷാപ്രവർത്തനത്തിന്റെ നല്ല മുഖങ്ങളായി.
അഭിനന്ദനം അർഹിക്കുന്ന രക്ഷാപ്രവർത്തനമാണ് ഇന്ത്യ നടത്തിയത് ബിബിസിയും സിഎൻഎനും പുറമെ സനയിലെത്തിയ ഏക ഇന്ത്യൻ ചാനലായിരുന്ന മാതൃഭൂമി ന്യൂസ്.
ഈ യാത്രയിൽ എന്നെ ഏറ്റവും അധികം സങ്കടപ്പെടുത്തിയതും സന്തോഷിപ്പിച്ചതും മാസം തികയാതെ എട്ടാം മാസത്തിൽ  കലാപ ഭൂമിയിൽ പിറന്ന വീണ കൈക്കുഞ്ഞിനെ  ഓർത്താണ്.സുരക്ഷിതയായി നാട്ടിലെത്തിക്കാൻ ഇന്ത്യൻ രക്ഷാസംഘം നടത്തിയ പ്രയത്നങ്ങൾ എത്ര പ്രശംസിച്ചാലും മതിയാകില്ല.മൂന്ന് ദിവസം മാത്രം പ്രായമുള്ളപ്പോഴാണ് അമ്മ രാജിയുടെ പേരിലറിയപ്പെട്ട ഇവൽ സനിയിൽ നിന്നും വിമാനത്തിലെത്തിയത്.ശ്വാസതടസ്സവും,മഞ്ഞപ്പിത്തവും അലട്ടിയിരുന്ന അവൾ ജീബൂട്ടിയിലെത്തിയപ്പോഴേക്കും ആകെ തളർന്നിരുന്നു.ഇവിടെയുള്ള സ്വകാര്യ ആശുപത്രിയിൽ പ്രവേശിപ്പിച്ച അവൾക്ക് മലയാളിയായ ഉമാ നന്പ്യാരെന്ന ശിശുരോഗ വിദഗ്ധ തുണയായി.പിറ്റെ ദിവസത്തെ വിമാനത്തിൽ പ്രത്യേക മൊബൈൽ ഇൻക്യുബേറ്ററിലാണ് ഇവളെ സുരക്ഷിതയായി കൊച്ചിയിലെത്തിച്ചത്.

മുക്കല്ല,ഹൊദൈദ,ഏദൻ എന്നീ തുറമുഖ നഗരങ്ങളിൽ നിന്നും കപ്പൽ വഴിയാണ് രക്ഷാപ്രവർത്തനം നടത്തിയത്.പടക്കപ്പലുകളായ ഐഎൻസ് സുമിത്ര,തർക്കാഷ് എന്നിവ യുദ്ധമുന്നണിയെന്നപോലെ തന്നെ ഇന്ത്യാക്കാരുടെയും മറ്റ് രാജ്യക്കാരുടെയും രക്ഷകരായി.
കേരളത്തിൽ നിന്നും എത്തിച്ച കപ്പലുകളായ കവരത്തിയും,കോറവും കലാപഭൂമിയിൽ നിന്നും നടുവൊടിഞ്ഞ് എത്തിയവർക്ക് ആശ്വാസവും വിശ്രമകേന്ദ്രവുമായി.അവസാന ദിവസം ഇന്ത്യാക്കാരുൾപ്പെടെ 482 യാത്രക്കാരുമായാണ് കപ്പലുകൾ ഇന്ത്യയിലേക്ക് പോയത്.ഇക്കൂട്ടത്തിൽ ഇന്ത്യൻ വംശജരായ 75യമൻ പാസ്പോർട്ട് ഉടമകളുമുണ്ടായിരുന്നു.
രക്ഷാപ്രവർത്തനത്തിന്റെ പ്രധാന കേന്ദ്രമായ ജിബൂട്ടിയിലെ വിമാനത്താവളത്തിലും,തുറമുഖത്തിലും ഇതുവരെ കാണാത്ത തിരക്കാണ്.തിരക്കിനിടയിലും ഇന്ത്യാക്കാർ നാടണഞ്ഞുകൊണ്ടേയിരിന്ന കാഴ്ച സന്തോഷം നൽകുന്നതായിരുന്നു.
നാല് ദിവസം നീണ്ട റിപ്പോർട്ടിംഗിന് ശേഷം മടക്കയാത്രക്കായി ജിബൂട്ടിയിലെത്തിയപ്പോഴേക്കും മറ്റൊരു സങ്കടക്കാഴ്ച എനിക്കുണ്ടായി.ഞാൻ വന്നിറങ്ങയോപ്പോൾ പരിചയപ്പെട്ട ഒരു യമനി അപ്പോഴും അവിടെയുണ്ടായിരുന്നു.കലാപം തുടങ്ങുന്നതിന് മുന്പ് മലേഷ്യയിലേക്ക് വിനോദസഞ്ചാരത്തിന് പോയ ഈ ഏദൻ സ്വദേശിയായ അബ്ദുൾ ഖാദർ.റാവിയെന്നും,റവാനെന്നും പേരുള്ള രണ്ട് പെൺമക്കളുടെ ഈ വാപ്പക്ക് ഏദനിലെ തന്റെ നാട്ടിലേക്ക് പോകാനുള്ള വഴി മുട്ടി വിമാനത്താവളത്തിലെ കാത്തിരിപ്പ് കേന്ദ്രത്തിലിരിക്കുന്ന കാഴ്ച വേദനാജനകമായിരന്നു.യെമനിൽ നിന്നും പ്രാണരക്ഷാർത്ഥം ഉള്ളതെല്ലാം ഉപേക്ഷിച്ച് നാട്ടിലേക്ക് പോകുന്നവർക്കിടയിൽ,സ്വന്തം രാജ്യത്തേക്ക് പോകാനുള്ള വഴിയില്ലാതെ വിഷമിക്കുന്ന യെമനികളുടെ മുഖവും ഈ കലാപഭൂമിയിലെ  വേറിട്ട മുഖങ്ങളായി.
യാത്രക്കിടയിൽ കുറെ ഡോളറും,ഐഫോൺ മൊബൈലും മോഷണം പോയി.ഈ നഷ്ടങ്ങളുടെ കണക്ക് ഒന്നുമല്ലെന്ന് എനിക്കറിയാം,അവിടെ നിന്ന് തിരിച്ചെത്തിയവരുടെ നഷ്ടങ്ങളുടെ കണക്കെടുത്താൽ.തിരിച്ച് ദുബായിൽ എത്തി പുതിയ സിമ്മ് കാർഡും മൊബൈലും സംഘടിപ്പിച്ച് ഓൺചെയ്തപ്പോഴേക്കും തിരിച്ചറിയാനാകാത്ത യമനിൽ നിന്നുള്ള നിരവധി മിസ്ഡ് കോളുകൾ എനിക്ക് കിട്ടി.ഇപ്പോഴും അത് തുടർന്ന് കൊണ്ടേയിരിക്കുന്നു........